Prishtinë, 13-17.10.2025
Në selinë e Agjencisë së Menaxhimit Emergjent ka filluar punën Misioni Vlerësues i Bashkimit Evropian për vlerësimin e sistemit të menaxhimit të rrezikut nga fatkeqësitë natyrore dhe fatkeqësitë tjera.
Ky proces është rezultat i përgatitjeve disa mujore dhe i koordinimit të ngushtë ndërmjet Agjencisë së Menaxhimit Emergjent dhe Mekanizmit Evropian të Mbrojtjes Civile, me pjesëmarrjen e ekspertëve nga disa shtete anëtare të Bashkimit Evropian.
Me këtë rast, Drejtori Ekzekutiv i AME-së, z. Genc Metaj, iu drejtua të pranishmëve me një fjalë rasti, duke i falënderuar për bashkëpunimin dhe duke ofruar mbështetjen e parezervë të zyrtarëve të Agjencisë në realizimin e këtij procesi të rëndësishëm vlerësues.
Të pranishëm në takim ishin edhe dy zyrtarë të Zyrës së Bashkimit Evropian në Kosovë, të cilët shprehën mbështetjen e tyre për këtë proces.
Ky aktivitet do të zgjasë gjatë gjithë javës, gjatë së cilës do të zhvillohen takime me institucionet përkatëse të të dy niveleve të qeverisjes.